Երեվանի Մխիթար Հերացու անվան պետական բժշկական համալսարան

Բժշկական կադրերի 100-ամյա դարբնոցում սովորողներին կրթություն է տրամադրում 1275 մասնագետ, որից 1000-ը դասախոս է, 221-ը՝ ասիստենտ, 54-ը՝ հրավիրված մասնագետ: Նրանցից 448-ը գիտությունների թեկնածու է, 148-ը՝ գիտությունների դոկտոր, 88-ը՝ պրոֆեսոր, 164-ը՝ դոցենտ, 3-ը՝ ակադեմիկոս, 70-ից ավելի` այցելու պրոֆեսոր: Գիտական հզոր այս ներուժը լուրջ դերակատարություն ունի Հայաստանում բժշկագիտության և հարակից գիտությունների զարգացման գործում։

Բժշկական մայր բուհն իր գոյության 100 տարիների ընթացքում ապահովել է մեր բնակչության, ժողովրդի առողջությունը: Այսօր համալսարանն ունի 6 ֆակուլտետ, որտեղ բժշկական կրթություն են ստանում 8000 սովորողներ: Յուրաքանչյուր 4-րդ ուսանող արտերկրից է: Ի տարբերություն նախորդ տարիներին 2018 թվականին բուհում գրանցվել է օտարերկրացի ուսանողների ամենաբարձր թիվը: Այսօր ԵՊԲՀ-ում սովորում է 1800 օտարերկրացի, որից 10 տոկոսը կլինիկական օրդինատորներ են: ԵՊԲՀ-ն ունի 3200 աշխատակից: