Yerevan State Medical University after Mkhitar Heratsi

  • Հայ
  • Рус
  • Eng

ԵԱՀԿ գրասենյակը բժշկական սարքավորումներ նվիրեց ԵՊԲՀ-ի «Մուրացան» հիվանդանոցին

01.06.2011

Երեխաների պաշտպանության միջազգային օրվա կապակցությամբ ԵԱՀԿ երևանյան գրասենյակը 5 հազար եվրո արժողությամբ բժշկական սարքավորումներ նվիրեց ԵՊԲՀ-ի «Մուրացան» հիվանդանոցի քիմիաթերապիայի կլինիկային, որտեղ մասնագիտացված բժշկական օգնություն են ստանում հեմատոլոգիական խնդիրներ ունեցող երեխաները:

Եվրոպայում անվտանգության և համագործակցության կազմակերպության երևանյան գրասենյակի ղեկավար, դեսպան Սերգեյ Կապինոսը նշեց. «Հուսով ենք, որ այս սարքավորումները կնպաստեն փոքրիկ հիվանդների ավելի արդյունավետ բուժմանը: Սա նաև լավ առիթ է երեխաների միջազգային օրվա կապակցությամբ ժպիտ պարգևել նրանց»:

Սերգեյ Կապինոսը նաև խաղալիքներ և նկարչական ու կերպարվեստի պարագաներ հանձնեց կլինիկայի հսկողության տակ գտնվող 12 երեխաներին:

Այս նվիրատվությունները կատարվեցին Վիեննայում կազմակերպվող ԵԱՀԿ ամենամյա բարեգործական պարահանդեսի հասույթից ստացված միջոցներով:

Նվիրատվության արարողությանը մասնակցում էին ՀՀ կրթության և գիտության նախարար Արմեն Աշոտյանը, ԵՊԲՀ-ի ռեկտոր Դերենիկ Դումանյանը, հիվանդանոցի աշխատակիցները, բաժանմունքում բուժվող երեխաները և նրանց ծնողները: ԵԱՀԿ երևանյան գրասենյակի ղեկավարին իրենց երախտիքը հայտնեցին թե՛ բուժաշխատողները, թե՛ հիվանդանոցում բուժվող երեխաների ծնողները:

ԵՊԲՀ-ի ռեկտոր, պրոֆեսոր Դերենիկ Դումանյանը չափազանց կարևորելով հիվանդ երեխաների նկատմամբ նման հոգատարությունը, բուժաշխատողներին կոչ արեց մշտապես առավել սրտացավ և ուշադիր լինել փոքրիկ պացիենտների հանդեպ:

Իսկ ՀՀ կրթության և գիտության նախարար Արմեն Աշոտյանը շեշտեց. «Այս քայլը լավ ապացույց է, որ ԵԱՀԿ-ն խիստ կարևորում է մարդկային արժեքները, մասնավորապես` մարդու կյանքը»:

 

Find us on Facebook